Хятад-Европын ачааны галт тэрэгний нийт аяллын тоо 140 мянгыг давлаа
Аравдугаар сарын 22-ны өглөө ОХУ-ын Москва хотыг зорьсон X8059 дугаарын галт тэрэг Шэньяны Пухэ өртөөнөөс хөдөллөө. Ийнхүү Хятад-Европын чиглэлийн ачааны галт тэрэгний нийт аяллын тоо 140 мянгад хүрч, тээвэрлэсэн барааны нийт үнийн дүн 560 тэрбум ам.доллароос давжээ. Гэр ахуйн цахилгаан хэрэгсэл, автомашины сэлбэг тээсэн энэхүү галт тэрэг нь Манжуурын хилийн боомтоор дамжин Москва хот ороход ес хоног зарцуулна. Энэ нь мөн энэ онд Шэньяны нэгтгэн тээвэрлэх төвөөс хөдөлсөн Хятад-Европын 280 дахь ачааны галт тэрэг юм.
Шэньяны төвийг оруулаад, одоогоор Хятад даяар Хятад-Европын ачааны галт тэрэгний нийт 14 нэгтгэн тээвэрлэх төв байгуулаад байна. Баруун, төв, зүүн коридоруудын дагуух маршрутуудыг оновчтой болгосноор, өдгөө Хятад улсад цагт 120 км хурдлах боломжтой 96 тогтмол маршрут ажиллаж байна. Энэхүү сүлжээ нь Хятад улсын 132 хотыг Европын 26 орны 237 хот, Азийн 12 орны 100 гаруй хоттой холбож, Евразийн эх газрыг бүхэлд нь хамарсан үйлчилгээ үзүүлж байна.
2026 он гарснаас хойш, Хятад улс маршрутын зам дагуух улс орнуудтай хамтран ажиллаж, "Хятад-Европ" чиглэлийн төмөр замын ачаа тээврийн үйл ажиллагааны үр ашгийг тасралтгүй дээшлүүлж байна. Тавдугаар сард сарын ачаа тээврийн хэмжээ түүхэн дээд түвшинд хүрсэн бол хилийн гол 6 боомтоор өдөрт дунджаар 51.2 галт тэрэг нэвтэрсэн нь өмнөх оны мөн үеэс 12.8%-иар өссөн үзүүлэлт юм. Түүнчлэн эдгээр боомт дахь гаалийн бүрдүүлэлтийн хамгийн богино хугацааг 30 минутын дотор тогтоон барих болжээ.
Одоогоор Хятадын есөн хот болон Европын зургаан хотын хооронд долоо хоног бүр тогтмол хуваарийн дагуу "Хятад-Европ" чиглэлийн 22 ачааны галт тэрэг аялж байгаа нь өндөр технологийн үйлдвэрлэлийн салбарын хил дамнасан тээврийн хэрэгцээг оновчтой хангаж байна. Бээжин хотоос 100 гаруй олон улсын ачааны галт тэрэг хөдөлж буй бөгөөд үүнд интеграл схем, эмнэлгийн хэрэгсэл, ухаалаг үйлдвэрлэлийн тоног төхөөрөмж зэрэг "Бээжингийн ухаалаг үйлдвэрлэл"-ийн бүтээгдэхүүнүүд нийт ачааны 90 гаруй хувийг эзэлж, нийслэл хотын өндөр нэмүү өртөг шингэсэн гадаад худалдааны бараа бүтээгдэхүүний экспортод хил дамнасан логистикийн тогтвортой шийдлийг бий болгож байна.