УБТЗ ХНН ТЗХАБ-д 1956 онд гишүүнээр элсчээ
Монгол Улсын Зам,Тээврийн Хөгжлийн Яамнаас зохион байгуулж буй “Тээврийн долоо хоног – 2023” олон улсын форумд оролцохоор манай улсад хүрэлцэн ирсэн Төмөр замуудын хамтын ажиллагааны байгууллагын дарга ноён Мирослав Антонович тэргүүтэй төлөөлөгчдийг “УБТ3” ХНН-ийн удирдлага хүлээн авч уулзлаа.
Уулзалтын үеэр талууд харилцан санал бодлоо солилцож, хамтын ажиллагаагаа өргөжүүлэх талаар ярилцав. Мөн ноён Мирослав Антонович УБТЗ-ыг тус байгууллагын хамгийн идэвхтэй гишүүний нэг болохыг онцлон тэмдэглэв.
ТЗХАБ нь Ази-Европын 30 улсыг эгнээндээ нэгтгэсэн том холбоо бөгөөд тус холбоонд "УБТЗ” ХНН 1956 онд гишүүнээр элссэн юм.
ТЗХАБ-ын дэд комиссуудаас баталсан дүрэм болон бусад эрх зүйн акт, хэлэлцээрүүдийг үндэслэн гишүүн төмөр замууд олон улсын ачаа, зорчигч харилцааны галт тэрэг солилцоо, техникийн болон тооцооны нөхцөлүүдийг харилцан зохицуулдаг.