УБТЗ-ын Замын даргын ээлжит үзлэг төвийн хэсэглэлд Амгалан өртөөнөөс өчигдөр эхэллээ. Амгалан өртөөний тээвэр зохион байгуулалт, зам, сум, холбоо дохиолол, эрчим хүчний найдвартай бэлэн байдал, бусад аж ахуйн нэгжийн ажлыг шалгалаа.
Үзлэгийн комисс зуны тээвэрлэлтийг амжилттай зохион байгуулахад чухал үүрэгтэй Улаанбаатар Зүтгүүрийн депогийн ашиглалт, засвар үйлчилгээг шалгаж, холбогдох үүрэг даалгавар өглөө.
Мөн өдрөө Замын II анги замын засвар үйлчилгээтэй танилцан зуны тээвэрлэлтийн үед хөдөлгөөний аюулгүй байдлыг хангахын тулд замын засвар үйлчилгээг тогтмол чанартай зохион байгуулан ажиллаж байгаа талаараа тус ангийн удирдлага тайлагналаа. Үзлэгийн комиссийн зүгээс тодорхой үүрэг даалгавар өгч, тус ангийн хамт олонд амжилт хүслээ.
Дохиолол холбооны II ангийн холбоо дохиоллын найдвартай бэлэн байдлыг мөн шалгасан юм. Зуны тээвэрлэлтийн үед хөдөлгөөний аюулгүй байдлыг хангахад дохиолол холбооны найдвартай байдал маш чухал болохыг онцгой анхаарч ажиллах талаар тодорхой үүрэг даалгавар өгч амжилт хүслээ.
