Мэргэжлийн ур чадвар сорих “Онц хөдөлгөөнчин” тэмцээний нэгдүгээр шатыг Дархан зангилааны хэмжээнд өнөөдөр зохион байгууллаа. Энэ тэмцээн нь Замын даргын А-400 тоот тушаалын дагуу хөдөлгөөнтэй холбоотой ажил үүрэг гүйцэтгэж буй ажилтнуудын мэргэжлийн болон хувийн ур чадваруудыг сорьж урамшуулах, харилцан туршлага солилцуулах, багаар ажиллах чадварыг сайжруулах ач холбогдолтой тэмцээн юм. Мөн ажилтнуудын онолын болон дүрэм, журмын мэдлэгийг бататгаж, манлайллыг үзүүлж төмөр замчдыг алдаршуулах, ажил мэргэжлээрээ бахархах сэдлийг төрүүлэх замаар зөв хандлага, ёс зүйг төлөвшүүлэх, ажлын хариуцлагыг сайжруулах сайн талтай. Галт тэрэгний аюулгүй байдлыг дээшлүүлэх, Замын аварга шалгаруулах тэмцээнд оролцох багийг сонгон шалгаруулах мэргэжлийн ур чадвар сорих энэ тэмцээнд Дархан өртөө, Дархан татах хэсэг, Замын I анги, Замын VI анги, Дохиолол холбооны ангийн ажилтнуудын төлөөлөл болон Дархан-1 Дархан -2 Шарынгол, Хөтөл Салхит өртөөдөөс замчид төлөөлөн оролцжээ.
