УБТЗ-ын Зорчигч тээврийн төвийн ээлжийн зохион байгуулагч Э.Чимэдлхамыг энэ удаагийн дугаартаа урилаа. Тэрбээр, 2015 онд ТЗДС-ийг ашиглалтын инженер мэргэжлээр төгсөж, Зорчигч үйлчилгээний төвөөс ажлын гараагаа эхэлж, өдгөө ес дэх жилдээ ажиллаж байна.

-Танай байгууллагын удирдлагууд өөрийг тань олон ажлын байранд ажиллаж, багагүй туршлага хуримтлуулсан хүн гэж тодорхойлсон. Төмөр замд нэг бичигдээгүй хууль байдаг нь залуу мэргэжилтнүүдээ бага тушаалаас эхлүүлэн шат ахиулан сургаж, дадлагажуулдаг шүү дээ. Тэр тусмаа ээлжийн зохион байгуулагчид ажлын байр бүрийн онцлогийг мэддэг байх нь чухал байх?

-Миний хувьд ашиглалтын инженер мэргэжлээр төгсөж ирээд заалны үйлчлэгчээр ажлын гараагаа эхэлж байлаа. Түүнээс хойш ихэвчлэн сул байгаа ажлын байруудад сэлгэн ажилласан. Тухайлбал, тасалбар тээш орлогын нярав, бичиг хэрэг, амрах байрны жижүүр, тээшийн кассын эрхлэгч, лавлан мэдээлэгч, ээлжийн зохион байгуулагч гэх зэргээр олон ажлыг хийж үзсэн минь өөртөө туршлага хуримтлуулах том боломж байсан. Харин зургадугаар сарын 20-ноос ээлжийн зохион байгуулагчийн орон тоонд томилогдоод ажиллаж байна. Өнгөрсөн есөн жилийн долоон жилд нь лавлан мэдээлэгчээр ажилласан. Мөн ээлжийн зохион байгуулагчаар ч түр орлон гүйцэтгэгчээр ажиллаж байсан. Ер нь, ээлжийн хамт олноо удирдан зохион байгуулахад өнгөрсөн хугацааны ажлын туршлага маань хамгийн их хэрэг болж байна даа. Ээлжийн зохион байгуулагч ээлжийн 40-50 ажилтныг хариуцдаг. Ингэхдээ ажилчдын ХАБЭА, зорчигч үйлчлүүлэгчдийн аюулгүй байдал, ГТХАБ-ыг хангахын тулд үйлдвэрлэл явагдаж байгаа дөрвөн цехийн ажилчдын үйл ажиллагаанд хяналт тавьдаг.

-Зорчигч үйлчилгээний төвөөр хоногт хичнээн хүн үйлчлүүлдэг вэ?

-Манай байгууллага бол 24 цагийн үйл ажиллагаатайгаараа онцлог. Манайхан хоёр ээлжээр ажилладаг. Хоногт орон нутаг болон олон улсын зорчигчийн галт тэрэгний аяллаас шалтгаалаад үйлчлүүлэгчдийн тоо 3000-4000 –ийн хооронд хэлбэлздэг.

-Үйлчилгээний ажил бол хамгийн ярвигтай ажил гэдэг хэн ч маргахгүй байх. Та бүхний хувьд зорчигч, үйлчлүүлэгчдийн хүсэл сонирхол, эрэлт хэрэгцээнд нийцсэн үйлчилгээг үзүүлэхийг зорьдог байх?

-Тэгэлгүй яах вэ. Зорчигч үйлчилгээний төвийн үйл ажиллагаа УБТЗ ХНН-ийн нүүр царай, нэрийн хуудас болдгоороо өндөр хариуцлагатай. Манай төв нь галт тэрэгний тасалбар худалдаалалт, орон нутгийн тээш, амрах байр болон лавлан мэдээлэх үйлчилгээ, захиргаа, аж ахуй гэсэн үндсэн таван цехтэй. Яг үйлдвэрлэлийн ерөнхий процесс маань дөрвөн чиглэлээр явагддаг. Манай ажилтнууд үйлчилгээний соёл, чанарыг эрхэмлэн, зорчигч, үйлчлүүлэгчдэд хөнгөн шуурхай, сэтгэл ханамжтай үйлчилгээг үзүүлэхийг зорьдог.

Үйлчилгээний ажлын үндсэн суурь бол хүн хоорондын харилцаа хандлага байдаг.

Үйлчилгээний чанар бол бидний ажлын гол зорилт.

-Үйлчилгээний чанарын үнэлгээг хэрхэн хийж, хянадаг вэ?

-Үйлчилгээний чанарын гол шалгуур нь зорчигч үйлчлүүлэгчдийн сэтгэл ханамж. Вокзалаар үйлчлүүлсэн хүмүүс 100 хувийн сэтгэл ханамжтай гарч байвал энэ бидний үйлчилгээний чанар тэр. Вокзалаар үйлчлүүлэгчдийн санал хүсэлтийг авах ажлыг улирал тутам зохион байгуулдаг. Харин галт тэргэнд явуулын кассирууд маань санал асуулгаа авдаг. Мөн цахим хэлбэрээр ч санал асуулга явуулж байгаа. Үйлчлүүлэгчдээс ирсэн санал хүсэлт, гомдлыг нэгтгээд дүн шинжилгээ хийж, түүний мөрөөр үйл ажиллагаандаа шинэчлэл хийх, шинэ санал санаачилгууд нэвтрүүлэх зэргээр үйлчилгээний чанарыг сайжруулах ажлуудыг тогтмол хийж байгаа.

-Хөгжлийн бэрхшээлтэй болон нэмэлт тусламж шаардлагатай иргэдэд та бүхэн хэрхэн үйлчилж байна вэ?

-Ээлжийн зохион байгуулагчийн 21-244399, 86114366 гэсэн тусгай дугаарт хөгжлийн бэрхшээлтэй болон нэмэлт тусламж шаардлагатай иргэд урьдчилан захиалгаа өгвөл бид угтан авч шаардлагатай тусламжийг үзүүлэн галт тэргэнд нь суулгах, мөн галт тэрэгнээс буусан үед нь таксинд суулгаж өгөх зэргээр үйлчилж байна. Манайд хөгжлийн бэрхшээлтэй иргэдэд зориулсан хөнгөлөлттэй тарифтай амрах өрөө ч бий.

-Монголчууд маань талархлаа тэр бүр илэрхийлээд байдаггүй мөртлөө уур бухимдлаа бол хүссэн үедээ илэрхийлдэг юм шиг санагддаг. Та бүхэнд “Баярлалаа” гэж хэлэх хүн хэр таардаг вэ?

-Ер нь, хүмүүсийн харилцаа хандлага жилээс жилд эерэг тал руугаа өөрчлөгдөж байгаа нь ажиглагддаг. Уур бухимдалтай хүн цөөн таарна шүү.  Мэдээж олон хүн дунд уурласан сандарсан, гомдсон хүн байдаг. Тийм үед нь бид аль болох хурдан тайвшруулаад тулгарсан асуудлыг нь шуурхай шийдвэрлээд өгөхийг зорьдог. Уурлаж орж ирээд асуудлаа шийдүүлээд “Баярлалаа” гээд гарах хүн цөөнгүй. Манай ажилтнуудад мөрдөж ажиллах үйлчилгээний стандарт гэж бий. Уурлаж бухимдсан, гомдсон хүмүүстэй хэрхэн харьцах вэ гэдэг харилцааны хичээл сургалтад ч хамрагддаг. Түүнийхээ дагуу л ажил үйлчилгээгээ явуулдаг болохоор хүндрэлтэй зүйл гайгүй дээ. Бидэнд үйлчлүүлэгчдийн “Баярлалаа” гэдэг үг маш их эрч хүч, урам зориг өгдөг шүү.

Бид ч бас үйлчлүүлэгч нартаа “Манайхаар үйлчлүүлсэнд баярлалаа. Дахин үйлчлүүлээрэй” гэж хэлдэг дээ.

-Цаг гарган ярилцсан танд баярлалаа. Ажилд нь амжилт хүсье!

Б.Гүнжинлхам