2023-2024 оны хичээлийн шинэ жилийн хүрээнд УБТЗ-ын Залуучуудын төв байгууллагаас санаачлан хэрэгжүүлж буй “Оюунлаг Баасан гараг” цуврал лекц энэ сарын 20-нд эхэллээ. Лекцийн нээлтэд Залуучуудын төв байгууллагын дэд тэргүүн Б.Азжаргал, Хувь хүний хөгжлийн сургагч багш Б.Дэлгэрхишиг нар оролцов. Мөн энэ үеэр УБТЗ-ын Залуучуудын төв байгууллага, ТЗДС хамтран “Уран илтгэл, мэтгэлцээн сонирхогч төмөр замчин залуусын клуб”-ыг нээж буйг албан ёсоор мэдэгдлээ.
Энэхүү клубыг байгуулснаар их, дээд сургуулиууд хооронд болон Улсын чанартай уран илтгэл, мэтгэлцээний тэмцээнд мэргэжлийн чадварлаг баг бүрдүүлж оролцох боломж нээгдэж байгаа юм. Ингэснээр “УБТЗ-ын оюунлаг залуус” гэсэн нэрийг улс, үндэсний чанартай тэмцээн уралдаанд тодоор гаргаж, амжилт үзүүлэн “Монголын мэтгэлцээний нэгдсэн танхим”-ын шалгуур үзүүлэлтэд нийцсэн мэргэжлийн илтгэгч, мэтгэлзэгчидтэй албан ёсны клуб байгуулах зорилт тавьж байна.
Тус клуб нь чадварлаг уран итгэгчдийн авьяас чадварыг нээн илрүүлэх, мэтгэлцэгч залуусыг мэргэжлийн түвшинд бэлтгэх гэсэн хоёр чиглэлтэй ажиллана. Ингэхдээ Залуучуудын төв байгууллагаас санаачилсан “Оюунлаг Баасан гараг”-ын хүрээнд нэг долоо хоногт уран илтгэл, дараагийн долоо хоногт мэтгэлцээний тэмцээн хуваариар хичээллэнэ. Цаашлаад улирал бүр уран илтгэгч, шилдэг мэтгэлцэгч залуусыг шалгаруулж урамшуулах, өргөн хүрээний тэмцээн уралдаанд оролцуулна.
