ТЗДС түүхт 70 жилийн ойгоо угтсан төлөвлөгөөт ажлын хүрээнд сургуулийн Ахмадын зөвлөлтэй хамтран “Ахмадаа алдаршуулъя”, “Гурван үеийн чуулга-2023” уулзалтуудыг зохион байгууллаа. Уг үйл ажиллагаанд УБТЗ-ын Ахмадын холбооны орлогч дарга М.Ганбат, ТЗДС-ийн ахмадын зөвлөлийн дарга Ц.Жавзмаа, Техник мэргэжлийн дунд сургуулийн орлогч захирал асан Д.Лхамсүрэн, Төмөр замын техникумын Сургалтын албаны дарга, орлогч захирлаар ажиллаж байсан Т.Нагваанжамц, ТЗДС-ийн захирал асан, Техникийн ухааны доктор Б.Сэрвүүд, ТЗДС-ийн захирал асан П.Нямсүрэн болон ахмадын төлөөлөл хүрэлцэн ирлээ. Энэхүү үйл ажиллагааг нээж ТЗДС-ийн Ахмадын зөвлөлийн дарга Ц.Жавзмаа үг хэлж, “Хөдөлмөр алдар”-аа тэмдэглэж байгаа ахмад ажилтан Ц.Туул, “Гурван үеийн уулзалт”-ын хүндэт зочин ахмад багш Д.Даваасамбуу нарт амжилт хүслээ. Учир нь, энэ удаагийн “Гурван үеийн уулзалт” нь “Алтан гадас” одонт, “Хүндэт төмөр замчин”, Боловсролын тэргүүний ажилтан, “Хүндэт ахмад” багш Дагважамцын Даваасамбуугийн үе үеийн шавь нарын дунд болсон юм. Уг үйл явдалтай хамтатган “Хөдөлмөрийн гавьяаны улаан туг”-ийн хошой одон, “Алтан гадас” одонт, МУСТА, “Хүндэт төмөр замчин”, Дэлхийн Монгол туургатны гавьяат, Нийслэлийн шилдэг эмэгтэй, Бүх ард түмний урлагийн үзлэгийн алт, мөнгөн медальт, сургуулийн Аж ахуйн даргаар олон жил үр бүтээлтэй ажилласан ахмад ажилтан Цэдэнгийн Туулын “Хөдөлмөр алдар”-ыг тэмдэглэлээ. Сургуулийн 70 жилийн ой угтсан эдгээр үйл ажиллgгаа нь үе үеийн төгсөгчдийг хооронд нь танилцуулах, алдаршуулах, ахмадуудынхаа сургамж, зөвлөгөөг сонсох, залуу үеийн төлөөлөл болсон мэргэжилтнүүдийн өнөө цагийн ажлын шинэ туршлагатай танилцах зэрэг олон давуу талыг бий болгож буй юм. Үүнд ахмад багш нар сэтгэл хангалуун байгаагаа илэрхийлж, сургуулийн удирдлага, багш, ажилтнуудын цаашдын ажил хөдөлмөрт нь өндөр амжилт хүслээ.
