SXCoal: БНХАУ-ын Шаньси мужийн уурхайд осол болж, Монголын коксжих нүүрсний үнэ өсөв

Шаньси мужид хүхэр багатай, сайн чанарын коксжих нүүрсний үнэ тонн нь 1683 юань болж, өмнөх долоо хоногоосоо 22 юаниар өсөөд байна

БНХАУ-ын Шаньси мужийн нүүрсний уурхайд болсон осол болсноор нийлүүлэлтийн доголдол үүсэж, коксжих нүүрсний үнэ өслөө.

Зургаадугаар сарын 15-ны өдөр болсон ослын улмаас гурван хүн амь үрэгдэж, хэд хэдэн хүн бэртсэний дараа муж даяар нэг сарын хугацаатай шалгалт хийхээр болсон байна. Энэхүү шалгалт долоодугаар сарын 16-ны өдөр дуусахаар байгаа аж. Осол гарсан уурхайн эзэмшигч “China Coal Energy” компани зарим уурхайнхаа үйл ажиллагааг түр зогсоожээ.

Зургаадугаар сарын 19-ний өдрийн байдлаар Шаньси мужид хүхэр багатай, сайн чанарын коксжих нүүрсний үнэ тонн нь 1683 юань болж, өмнөх долоо хоногоосоо 22 юаниар өсөөд байна.

Үүний зэрэгцээ Монгол Улсаас болон ОХУ-аас худалдан авсан нүүрсний үнэ өсөж байгаа аж. Монголын V ангиллын коксжих нүүрсний НӨАТ оруулаагүй үнэ тонн нь 1150 юань болсон нь өнгөрсөн долоо хоногийн эцсээс 30-50 юаниар өссөн дүн болж байна.