Шивээхүрэн-Сэхэ, Бичигт-Зүүнхатавч боомтуудыг 15-20 км урт төмөр замаар холбоно

Тавантолгой-Зүүнбаян чиглэлийн төмөр замаар 2023 онд 5 сая тонн нүүрс тээвэрлэнэ. 2023 онд Тавантолгой-Зүүнбаян чиглэлийн төмөр замаар таван сая тонн, Тавантолгой-Гашуунсухайтын төмөр замаар 2.8 сая тонн нүүрс тээвэрлэхээр төлөвлөж байна. Засгийн газар боомтын сэргэлтийн хүрээнд шинэ төмөр зам ашиглалтад оруулахыг “Монголын төмөр зам” компанид үүрэг болгоод байгаа юм. 

Шивээхүрэн-Сэхэ болон Бичигт-Зүүнхатавч боомтуудыг 15-20 км урттай төмөр замаар холбох бэлтгэл ажлыг хангаж байна. Боомтуудыг холбосон төмөр замыг энэ оны долоодугаар сард ашиглалтад оруулж, он дуустал 250-300 мянган тонн ачаа тээвэрлэхээр төлөвлөжээ.

Монголын талаас Бичигт боомтод есөн км-ийн урт хил холболтын төмөр зам барина. Харин Шивээхүрэн дээр 13 км-ийг барих аж.

Монгол Улсын төмөр замын сүлжээ өргөжиж, Тавантолгой-Зүүнбаян чиглэлийн 416.1 км төмөр зам ашиглалтад ороод байна. Энэхүү төмөр замын зүгшрүүлэх тээвэрлэлтийг өнгөрсөн оны гуравдугаар сард эхлүүлээд байгаа бөгөөд нийт 729.5 мянган тон ачаа тээвэрлэжээ.