Оны эхний найман сард төмөр замаар 2.69 тэрбум тонн ачаа тээвэрлэжээ
Есдүгээр сарын 20-нд Хятадын Төмөр замын группээс мэдээлснээр, энэ оны эхний найман сард улсын төмөр замаар нийт 2.69 тэрбум тонн ачаа тээвэрлэж, хоногт дунджаар 187 мянга 400 вагонд ачаа ачин, ачаа тээврийн хэмжээ өндөр түвшинд тогтвортой хадгалагджээ.
Эхний найман сард улс орны эдийн засаг, иргэдийн амьжиргаанд чухал шаардлагатай бараа бүтээгдэхүүний тээвэрт хүчин чадлаа түлхүү хуваарилан, нэн тэргүүнд тээвэрлэж, түргэн шуурхай хүргэхийг баталгаажуулсан байна. Энэ хугацаанд нийт 1 тэрбум 389 сая тонн нүүрс тээвэрлэсний 928 сая тонн нь цахилгаан үйлдвэрлэлийн зориулалттай нүүрс байв. Улсын төмөр замаас шууд нүүрс нийлүүлдэг цахилгаан станцуудын нүүрсний нөөц өндөр түвшинд хадгалагджээ. Үр тариа, химийн бүтээгдэхүүн, нэхмэл бүтээгдэхүүний тээврийн хэмжээ өмнөх оны мөн үеэс тус тус 9.9 хувь, 5.5 хувь, 21.7 хувиар нэмэгдсэн байна.
Түүнчлэн зорчигчдын галт тэрэгний адил тогтмол хуваарьтай хурдан ачааны галт тэрэг ажиллуулж, эхний найман сард нийт 33 мянган удаа явуулан, 36 сая 132 мянган тонн ачаа тээвэрлэсэн нь өмнөх оны мөн үеэс 37 хувиар өсжээ. Ингэснээр цахим худалдаа, хүйтэн хүргэлтийн тээвэр зэрэг шуурхай логистикийн зах зээлийн хэрэгцээг илүү оновчтой хангаж байна. Мөн төмөр зам–усан замын хосолсон тээврийн “нэг баримт бичиг”-ийн үйлчилгээг хөгжүүлж, эхний найман сард чингэлгийн төмөр зам–усан замын хосолсон тээврийн хэмжээ 8.6 хувиар өсжээ. Төмөр зам–авто замын хосолсон тээврээр 320 сая тонн ачаа тээвэрлэсэн нь 65.5 хувиар нэмэгдсэн үзүүлэлт юм.
Хятад–Европ (Ази) чиглэлийн ачааны галт тэрэгний хөдөлгөөн тогтвортой үргэлжилжээ. Эхний найман сард Хятад–Европ (Ази) чиглэлд нийт 24 мянга 605 галт тэрэг аялсан нь өмнөх оны мөн үеэс 9.7 хувиар нэмэгдсэн байна. Үүнээс Хятад–Европын ачааны галт тэрэг 14 мянга 842 удаа аялж, 15.9 хувиар өсжээ. Хятад–Лаосын төмөр замын хил дамнасан ачааны галт тэрэг болон Баруун бүсийн хуурай-далайн шинэ гарцын төмөр замын хосолсон тээврийн галт тэрэг тогтвортой ажиллаж, “Бүс ба Зам”-ыг чанартай хамтран бүтээн байгуулах, Хятадын гадаадад өндөр түвшний нээлттэй байдлыг ахиулахад тээврийн найдвартай баталгаа болж байна.