BMI: Зэсийн үнэ ирэх хоёр жилд 75 гаруй хувиар өснө
Уул уурхайн нийлүүлэлт тасалдсан, сэргээгдэх эрчим хүчний эрэлт хэрэгцээ нэмэгдэж байгаа энэ үед зэсийн үнэ ирэх хоёр жилд 75 гаруй хувиар өсөх төлөвтэй байна. Ногоон эрчим хүчний шилжилтээс үүдэлтэй эрэлт нэмэгдэж, 2024 оны хоёрдугаар хагаст ам.долларын ханш буурах магадлалтай байгаа нь зэсийн үнийг өсгөнө гэж “Fitch Solutions” судалгааны нэгжийн BMI тайландаа дурджээ.
АНУ-ын Холбооны нөөцийн сангаас энэ онд бодлогын хүүгээ бууруулснаар ам.долларын ханш суларч, зэс гадаадын худалдан авагчдын сонирхлыг татахаар байгаа аж. Саяхан болсон COP28 уур амьсгалын өөрчлөлтийн бага хурал дээр 60 гаруй улс 2030 он гэхэд дэлхийн сэргээгдэх эрчим хүчний хүчин чадлыг гурав дахин нэмэгдүүлэх төлөвлөгөөг дэмжсэн нь зэсийн салбарт таатай нөхцөл бүрдүүлэхээр байна. Хөрөнгө оруулалтын банк сэргээгдэх эрчим хүчний зорилтыг нэмэгдүүлснээр 2030 он гэхэд зэсийн эрэлт 4.2 сая тонноор өснө гэж таамаглаж байсан. Энэ нь 2025 онд нэг тонн зэсийн үнийг 15 мянган ам.долларт хүргэх магадлалтай гэж тайланд дурджээ. Нийлүүлэлт бага, эрэлт их Лондоны металлын бирж дээр хамгийн сүүлд нэг тонн зэс 8559 ам.доллароор арилжигдаж байна. Үндсэн металл нь эрчим хүчний шилжилтийн экосистемийн гол тулгуур бөгөөд цахилгаан машин, цахилгаан сүлжээ, салхин сэнс үйлдвэрлэхэд чухал үүрэг гүйцэтгэдэг.
Эх сурвалж: Сnbc.com