АВЛИГАТАЙ ТЭМЦЭХИЙН ТУЛД 5Ш АЖИЛЛАГААГ ХЭРЭГЖҮҮЛНЭ

Засгийн газар 2023 оныг “АВЛИГАТАЙ ТЭМЦЭХ ЖИЛ” болгон зарлажээ. Энэ хүрээнд Монгол Улсын Засгийн газар авлигатай тэмцэх үйл ажиллагаанд манлайлж, Авлигатай тэмцэх 5 Ш ажиллагааг хэрэгжүүлж, авлигыг таслан зогсооно хэмээн мэдэгдлээ.

1.  Шүгэл ажиллагаа -  Авлига, албан тушаалын гэмт хэргийн талаар нийтийн эрх ашгийн төлөө мэдээлж байгаа шүгэл үлээгчийг хамгаалж, урамшуулан дэмжинэ.

2.  Шүүр ажиллага - Хууль ёсны орлогоос давсан хэрэглээг таслан зогсоож, нийтийн албанд танилын хүрээгээр томилогддог явдлыг бүрмөсөн халж, авлигачдыг төрөөс шүүрдэн зайлуулна.

3. Шувуу ажиллагаа - Төрөөс хулгай хийгчид гадаад улс руу оргон зайлсан ч монгол төрийн гар, хуулийн буулга тэдэнд хүрч ял шийтгэл оноодог болно.

4. Шилжүүлэн авах ажиллагаа - Оффшор бүсэд хулгайлсан хөрөнгөө нуун дарагдуулдаг байдалтай хатуу тэмцэж, хууль бус замаар олсон хөрөнгө орлогыг хураадаг болно.

5. Шил ажиллагаа- Төр засгийн болон улс төрийн нам, төрийн өмчит компаниудын үйл ажиллагааг ил тод шилэн болгож, авлига ашиг сонирхлын буртагт бохирдсон төрөө тунгалагшуулна.

Энэ 5 Ш-ийг тууштай зөв хэрэгжүүлсэнээр нийгэмд шударга ёс тогтож, монгол төрийн дархлаа сэргэж, үндэстний итгэл үнэмшил хүсэл зоригт шинэ сэргэлт ирнэ гэж үзэж байгаа юм байна.